Ἑρμοῦ, θυμίαμα λίβανον. Κλῦθί μευ, Ἑρμεία, Διὸς ἄγγελε, Μαιάδος υἱέ, παγκρατὲς ἦτορ ἔχων, ἐναγώνιε, κοίρανε θνητῶν, εὔφρων, ποικιλόβουλε, διάκτορος, Ἀργειφόντα, πτηνοπέδιλε, φίλανδρε, λόγου θνητοῖσι προφῆτα· γυμνάσιν ὃς χαίρεις, δολίαις τ’ ἀπάταις, (στρ)οφιοῦχε. ἑρμηνεῦ πάντων, κερδέμπορε, λυσιμέριμνε· ὃς χείρεσσιν ἔχεις εἰρήνης ὅπλον ἀμεμφές· Κωρυκιῶτα, μάκαρ, ἐριούνιε, ποικιλόμυθε, ἐργασίαις ἐπαρωγέ, φίλε θνητοῖς ἐν ἀνάγκαις· γλώσσης δεινὸν ὅπλον, τὸ σεβάσμιον ἀνθρώποισιν· κλῦθί μευ εὐχομένου, βιότου τέλος ἐσθλὸν ὀπάζων, ἐργασίῃσι, λόγου χάρισιν, καὶ μνημοσύνῃσιν.